الثلاثاء، 30 سبتمبر 2008

فوبيا مهند

ايوه بتكلم عنه هو فيه غيره
مسلسل نور لعنه البيوت العربيه

فلا تتعجب اذا قررت ان تقوم بعمل استفتاء عن سر حالات الطلاق حديثا
فتجد ان السبب الرئيسى فى معظم الحالات هو مهند
ايوه مهند هو فى غيره
وده طبعا كان اهم دافع خلى مفتى السعوديه يحرم مشاهدته

يعنى الناس قدرت تتعايش مع الغلاء
وتتحايل على سوء الحال
وتدبرها باليمين والشمال عشان تحافظ على استقرار بيتها
واللى يعوذه البيت يحرم على الجامع
وعديها علشان المركب تمشى
وانا مستحمله بس عشان اربى العيال
راحوا فين العيال لما يلاقوا الحاجه بتتطلق علشان الحاج مش شبه مهند

******************
مهند هذا الثرى الوسيم
اللى مكنش فتى احلام البنات بس
لا والستات و الجدات الاحياء منهم و الاموات


(عشان تصدقونى لما اقولكم لعنه)

**********************
وبتحليل يسيط نجد ان مسلسل نور
قدم صوره مثاليه للبطل الوسيم صاحب المال
عاشق نور التى هى اقل منه جمالا وبالرغم من هذا كان بها مغرما

(ومش عاوزين البنات تتهبل )

وبعد ان يشحن الجنس اللطيف
ولمده تزيد عن 150 حلقه بهذا الكم من المثاليات


تبدأ عمليه مقارنه لهذا الذى لايشبه مهند ولن يشبهه بأى حال من الاحوال
(الحلو حلو برضه)
وطبعا عشان منقلش البنات تافهه (بصراحه يستاهلوا يتقال عليهم كده )
الاعجاب بمهند ليس لشكله فقط
(والله مافيه ريحه الوسامه...سامحنى يارب ... هو عادى يعنى.. ده حسين فهمى برقبته )


عموما هذا مسلسل بالرغم مما فعله من ضجه كبيره ومساوئ لاتغفر له نجاحه
الا انه قد كشف لنا حقيقه وغير فى معايير اختيارات البعض منا
واخيرا انتهى المسلسل مع وعود مصريه بعرضه على القنوات الارضيه
بس مش مهم المهم انه خلص ولكن وكما قال الشاعر
يافرحه ماتمت


فتأتى الطامه الكبرى
مهند فى مصر وبحمله اعلانات
زى اعلان السيراميك ده اللى لو جابولى عقل على عقلى
عمرى ما هخمن ان ده اعلان سيراميك
الدنيا ضلمه كحل
ومفيش سيراميكيايه واحده تقول انا اهه
اينعم خدله فى الشغلانه دى 3 مليون
مهو مهند برضه مش اى كلام
وده طبعا غير كم الاعلانات التانيه من عطور لسيجنال تو
وان شالله محد حوش


وده طبعا عمل اثاره وشغب ولخبطه جامده
ومظاهرات ومشاحانات ازاى مهند ينزل مصر يعمل اعلانات ونوور لاء
بقه ده اسمه كلام

وفى اقتراحات برلمانيه تشيد بالاخ مهند يعمل اعلان ترشيد استهلاك المياه
والمحافظه على مدرستى نظيفه جميله متطوره
مدام الاخ مهند بقه ليه كلمه وواصل كده
بركاتك يا مهند


من الاخر مهند انتشر فى العالم العربى كانتشار النار فى الهشيم

وبصرف النظر عن كل اللى قولناه
الا انه فعلا هذا الوضع ابكانى على حال هذه الامه
اللى كل مدى ماتثبتلنا ان التفاهه العامه اصبحت هى الاكثر انتشارا
بجد ربنا يرحمنا برحمته
ولا يغير الله مابقوم حتى يغيروا ما بانفسهم
ولنا الله


*********************************


هناك 30 تعليقًا:

tarek alghnam يقول...

كل عام أنتم بخير ..
فوق كل أرض وتحت كل سماء..
كل عام وأنتم بخير وتقى , وهدى وإيمان , وعلم وقرآن ..
كل عام والذنب مغفور , والعمل مقبول , والعيب مستور..
كل عام والقلب أنقى , والعقل أوعى , والنفس أطهر وأزكى..
كل عام وأيامكم كلها رمضان..
اما عن البوست الرائع
فالشعب العربى يعشق التفاهات كماقلتى
ولا حول ولاقوة الابالله
هو دة حالنا
ربنا يغير

dina seliman يقول...

طارق الغنام
رائع بوجودك وبمعايدتك
دمت بكل الخير
وعيد سعيد

elsha3er يقول...

السلام عليكم
اولا انا بهنيكى على اسلوبك اللى بيشد للقراية ثانيا انا بصراحة ما تبعتش المسلسل دة ولا سمعت عنه ولا اعرف مهند
بس بعد اللى قرأته انا مش عايز اشوف حاجة
وجزاكى الله خيرا
وكل عام وحضرتك بخير

احمد الشاعر

د/ رامي شهاب الدين يقول...

على فكرة ياجماعة
الموضوع مش موضوع مهند ولا وسامته
الناس بتعشق رومانسيته وتعامله أما وسامته فده شئ ثانوى بحت
للاسف فى وطننا العربى مش بنهتم بالحاجات دى رغم إن إسلامنا الحنيف أمر بالمعاشرة بالمعروف والملاطفة والمداعبة إللى أصبح ليها إسم عصرى جديد وهو الرومانسية
قبل ماتحاسبوا الفتيات والسيدات لماذا أصيبوا بهوس مايسمى باسم مهند ، حاسبوا الأزواج الذين يهملون زوجاتهم
طبعا موضوع الهوس بالممثل التركى السمسى مهند شئ سخيف ويدل على فراغة العقل ولكن كما تعلمنا فى الفيزياء أن لكل فعل رد فعل
إذن إبحثوا وعالجوا الفعل الذى كان رد فعله الهوس بمهند
تحياتى

محمد فاروق الشاذلى يقول...

أسعدنى حظى بعدم متابعة هذا المسلسل والحمد لله، أرجوك اقرأى التعليقات على قصة امرأة فى الملابس السوداء المنشورة فى مدونتى وستجدى أن رومانسية الرجل هى التى تجذب النساء وليس الوسامة.

dina seliman يقول...

elsha3er

شكرا ليك يا احمد على رايك
ومش هستغرب انك مشفتش المسلسل
بس متسمعش عن مهند صعبه
وعموما اهه بقه عندك خلفيه عنه
صحيح خلفيه سودا بس ربنا يتولنا برحمته

وشكرا مره تانيه لوجودك

dina seliman يقول...

ابله نظيره
كلامك اكيد صح
مهند ده زى المخدرات مش كل مانقع فى مشكله نرحلا ونقول ده بسبب المشاكل
لازم يكون عندنا عقل يحكم ويميز ويقرر
وعيد سعيد ياقمر

dina seliman يقول...

قلب مصرى
اكيد طبعا انامعاك ان الرومانسيه هى اللى شدت النساء
والمثاليه فى التعامل
اللى بقت عمله اكثر من نادره
وحين تطبيقها على الواقع واكتشاف اختفائها بتبقى دى الحاجه الصعبه
اللى ادت لكل المصايب المهنديه دى
ولنا الله

وكل سنه وانت بالف خير
وعيد سعيد

أ / أحمد عبد المنعم يقول...

بسم الله الرحمن الرحيم
كل عام وأنت بخير
وكل زائرى مدونتك
وتقبل الله الصيام
والقيام
والزكاة
وجعله عيد يمن وبركة عليكم
وأدعوك لزيارة مدونتى " أمــــى "

dina seliman يقول...

احمد
كل عام وانت بالف خير
وعيد سعيد عليك وعلى اسرتك الكريمه
ولى زياره لمدونتك باذن الله

سنووايت يقول...

المسلسل دا كان بيستفزني بجد
باختصار شديد
مهند ظاهرة هتاخد وقتها وهتروح

كل سنة وانتي طيبة يا دندن

dina seliman يقول...

سنووايت
عندك حق يا قمر
مهند ده ظاهره وبالوقت هينتهى
بس بعد مدمر بيوت ناس
المهم اننا نتعلم من الدرس

وكل سنه وانتى بالف خير ياقمر

غير معرف يقول...

بصى
انا ماشفتش المسلسل ولا تابعت حالات الطلاق اللى زادت ولا اعرف حاجه عن اللى بيحصل بره
بس انا معترضه على مدى تفاهة الناس اللى تتعلق بمسلسل خيالى
خياااااااااالى
لدرجة انها تتطلق
هما ممكن يكونوا هايتطلقوا من الأول
ماهى جايز الواحده تكون حست ان كرامتها مهانه ونفسها فى كلمة حلوه
بس ليه ماكانش م الاول
ماعلينا قبل ما اخطرف
الحكومه عاوزه تلهى الشعب وخلاص
والله دى قلبها علينا
تفتكرى نسبة الطلاق فى مصر هاتزيد؟

dina seliman يقول...

وينكى باشا
سلامات ياقمر
والله احسن حاجه انك مشفتهوش
وبالنسبه لحلات الطلاق فهى مش محتاجه لامهند ولا غيره
لانها فى ازدياد زى الاسعار تمام
وكل سنه وانتى طيبه
وعيد سعيد

موناليزا يقول...

جميل ان تكون نظرتك رغم حداثة سنك له بهذا الشكل ربنا يحميكى ويثبتك
وكل سنة وانتى بخير وصحة وسعادة

صباح الصباح يقول...

انتى عارفة يا دينا

انا كمان مش باحب مهند

وابدا مش غيرة

بس باحس انة فاقع اوى كدة

بتعجبنى الوسامة الرجولية

زى مين؟؟

ميل جبسون مثلا
احمد عز
محمود يس
احمد رمزى

وكدة انما مهند .. ابن مين فى البلد دة اصلا؟؟؟؟؟

dina seliman يقول...

مناليزا
شكرا ليكى ياقمر
وكل سنه وانتى بالف خير

dina seliman يقول...

صبح الصباح
تصدق والله عندك حق
انا شايفه ان فى احلى منه كتير
وبعدين مصر طول عمرها ولاده
اخرتها هنروح للتركى


كل سنه وانت طيب
وعيد سعيد عليك

Alkomi يقول...

الحمد لله ربنا ما كتبليش اني اشوف سحنته البهية

بس لو لا قدر الله قابلته في جهنم ما اديكيش فيه امارة تفرقه عن شيكابالا ولا احمد زكي

سمعت اوشاعة ان هو اللي بيصور اعلان سيراميكا رويال

لو هو فعلا

فاحب اهديله

بصقة كبيرة لانه سئيييييييييييل

dina seliman يقول...

محمد الكومى
الحمد لله انك متشرفتش بيه
وفعلا هو بتاع سيراميكا رويال
ويقال ان الاعلان ده اخد فيه 3 مليون
شوف يسكنوا كام شاب وبرضه كانت هتبقى دعايه جامده

وعيد سعيد عليك
وكل سنه وانت بالف خير

Alkomi يقول...

طيب ايه الفايدة الاعلانية اللي عادت عليا لما طلع علينما بسحنته البهية عشان يقولنا

سيراميكا رويال

kingdom of beauty

استفدنا ايه يعني بالابتسامة السئيلة دي

ده لو هو ده الواد اللي بيتكلموا عنوا يبقى البنات دماغها لسعت و عليه العوض و منه العوض فعلا

شكرا لتأكيد ال أوشاعة يا دينا

dina seliman يقول...

محمد الكومى
هى من ناحيه لسعت لسعت
ويارب تبقى اخر الاعلانات
الا انا سمعت انه هيتجه للكليبات كمان
تقريبا مع رولا سعد

وربنا يستر

elsha3er يقول...

السلام عليكم
قد تم بحمد الله افتتاح مدونة للسكندرين
فقط ارجو ان تكونى معنا بأضافة رد لحصر المدونين
اللينك
www.firstway1.blogspot.com

احمد الشاعر

mohamed ghalia يقول...

ههههههههههههه
انتظروا الجزء الثانى من مسلسل مهند بس ياترى هيكون إزاى ومن هيكون البطل؟!
ربنا يستر علينا ويحفظنا من إلى بيلعبوا بينا
كل سنة وحضرتك بخير

Abo 7anf يقول...

السلام عليكم
ازيك يدينا كل سنه وانتى طيبه
معلش هى متاخره قوى
بس مصدقت ان النتيجه طلعت وسافرت
المهم
كنت مره فى اتوبيس وسمعت اتنين واحده بتقول لخطيبها نفسى تبقى شبه براد بيت
قلها بسيطه تبقى انتى الاول انجلينا جولى
بس نرجع نقول مفيش احسن من بنت بلدى علشان الرقابه
ربنا يشفى عقولنا

أحمد سلامــة يقول...

حاجة تــ ...
انا معفرتني بصراحة اني لاقيت استفتاء على مدنة زميل عزيز مفكر واراءه محترة جدا عن العته ده وشخصيتك ايه من مهند وحماتك تشبه لنور ولا لخالتك الى اخر هذا القرف
وفعلا
وبدون ادنى تحيز
احنا من اتفه شعوب الارض

dina seliman يقول...

Abo 7anf
كل سنه وانت طيب المهم تكون عملت كويس فى النتيجه
وانت اكيد عندك حق مليون المايه
متطلبيش مهند الا لو كنتى نور

متطلبش الا لما تكون قادر انك تدى
وربنا يشفى عقولنا فعلا

dina seliman يقول...

احمد سلامه
شكرا ليك وجودك وتعليقك
بس الموضوع مش للدرجه دى
متكبرهووش لسه عندناعقول وناس بتفكر
ولو قله تاهت وسط الزحمه
برضه عندنا دماغ وبنفكر
وربنا يهدى القله القليله دول

مصري بالغربة يقول...

بصراحة معاكي حق جدا
ازيك الاول يا دينا
انا بالصدفة شوفت مدونتك على الفاس بوك لينك ليها
وقلت اشوف الكاتبة الكبيرة كاتبة ايه

بس انتي مش شايفة بردوا ان نسبة الطلاق زادت بردوا والاحتقان الزوجي
بعد ظهور
صواريخ الفيديو كليب

نانسي بنت عم عجرم

وهيفاء بنت عم وهبي

وغيرهم

dina seliman يقول...

مصرى بالغربه
اهلا بييك منور المدونه
وبالنسبه لصواريخ الفديوو كليب فمن العادى ان الراجل يعمل كده مش هنستغرب يعنى
لان بيهم من غيرهم العين الزايغه دى فى دمهم

بس لما تبقى حاجه موقره ست بيت
وتقلك مهند مهند
يبقى ده مش عادى ولازمله وقفه