الخميس، 24 يوليو 2008

كان ياماكان

كان ياماكان وده كان زمان

كان فى انسان ومش انسان

قال مش قادر خلاص تعبان

جاله كبير العسكر خان

عامل غاغه ليه وقلبان

بتقول ايه سمعنى كمان

كفايه خلاص مفيش كلام

خلى وحوش الغابه تنام

عيش غلبان وموت غلبان

وسط الضلمه اوعى تبان

وبلاش اكون منك زعلان

على الحبل امشى ايوه بهلوان

ولون وشك بكل الالوان

اكتب غنى وارقص كمان

ومتنساش تدعى فى كل ادان

عاش السلطان
عاش السلطان


السبت، 12 يوليو 2008

انا المواطن انسان


انا المواطن انسان
مجرد عدد فى كشوف المواليد
مجرد رقم من ارقام الملايين
وقريبا سألتحق بسجل الوفيات
انا بلا فخر لايوجد منى فائده
لا افعل شئ ويفعلون بى الكثير
لا اقول قولا الا وضده اسير
ما ذا سيحدث ان مت غدا
لن تتوقف الدنيا حزنا
ولن يحضر عزائى احد
قد يبكى بعض الاهل قليلا
لاحزنا بل رغبه فى البكاء
لانهم جميعا هذا الانسان

الثلاثاء، 1 يوليو 2008

عندما هرب العفريت


مين على الباب
انا المريب الخطير الرهيب
والمفروض بقه انى اخاف
يابنتى لازم تخافى انا العفريت
يابنى انجز عايز ايه
انتى مش بتخافى ليه ؟؟
ده انا العفريت ابن ملك الجان
تشرفنا اصل عاوزه انام
قعد يعمل حركات ويطلع اصوات
وفجأه انهار بالعياط
مالك بتعيط ليه
مبقتش اخوف لانس ولاجان
وانا اكل عيشى اعمل قلبان
تخوف مين ياغلبان
انت مش عارف احنا سنه كام
احنا القرن الواحد والعشرين
يعنى مالكش عندنا مكان
انا العفريت افهمى
لا ده كان زمان
ليه يعنى خلاص الكل شجعان
ولا اتملى قلبكم بالايمان
انت شكلك مزرتش بلاد الافغان
طب مريت على الصومال
زرت العراق سمعت عن ايران
طب سوريا ولا حتى لبنان
واكيد متعرفش غزه و الجولان
ولا سمعت عن مجاعه السودان
كفايه ولا اقول كمان ؟؟
ياعفريت استنى رايح فين !!
شكلك هتهرب انت كمان ؟!